އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން މަސައްކަތް ކުރަނީ ރާއްޖޭގައި އަޅާލުމާއި ރައްކާތެރިކަން ބޭނުންވާ ފަރާތްތަކުގެ ޙައްޤުތައް ޙިމާޔަތްކޮށްދީ އެފަރާތްތަކުގެ ޙައްޤުތައް ކުރިއެރުވުމަށެވެ. ވުޒާރާގެ މައިގަނޑު ޒިންމާތަކުގެ ތެރޭގައި ހިމެނެނީ؛ އަންހެނުންނާއި ކުޑަކުދިންނާއި ދޮށީއުމުރުގެ މީހުންނާއި ނުކުޅެދުންތެރިކަން ހުންނަ ފަރާތްތަކުގެ ޙައްޤުތައް އަދި ޢާއިލީ ދުޅަހެޔޮކަން އިތުރު ކުރުމާއި، އަންހެނުން ބާރުވެރި ކުރުވުމާއި، ދެޖިންސްގެ ހަމަހަމަކަން ކަށަވަރު ކުރުމާއި، ދުޅަހެޔޮކަން އިތުރުކުރުމާއި،  ނާޒުކު ހާލަތްތަކުގައި އުޅޭ އެންމެހާ ފަރާތްތަކަށް އިޖުތިމާޢީ ރައްކާތެރިކަމުގެ ޚިދުމަތްތައް ފޯރުކޮށްދިނުމަށެވެ. އަދި އެފަރާތްތަކުގެ ޙައްޤުތައް ރައްކާތެރި ކުރުމަށް ހުރަސްއެޅޭ އާ މައްސަލަތައް (އިމަރޖިންގ އިޝޫސް) ދެނެގަނެ، ޚިދުމަތް ފޯރުކޮށްދިނުމާއި އެމައްސަލަތައް ހައްލުކުރުމަށް ކަމާބެހޭ ދާއިރާތަކާ ގުޅިގެން މަސައްކަތް ކުރުމެވެ.

މިނިސްޓްރީ ހިންގަނީ އިޖްތިމާޢީ ތަރައްޤީގެ ވަކިވަކި ދާއިރާތަކަށް އަމާޒުކޮށްގެން ޚާއްޞަ ޑިވިޜަންތަކާއި، ޑިޕާޓްމަންޓްތަކާއި، ސެކްޝަންތަކާއި، ޔުނިޓްތަކުގެ ވިއުގައެއްގެ ތެރެއިންނެވެ. ޚާއްޞަ އިޖްތިމާޢީ ޑިޕާޓްމަންޓްތަކުގެ ތެރޭގައި ޖެންޑަރ އެފެއާޒް، ސޯޝަލް ސަރވިސަސް، އެލްޑަރލީ ރައިޓްސް އެންޑް ވެލްބީންގ، ޑިސްއެބިލިޓީ ރައިޓްސް އެންޑް ވެލްބީންގ، ޕްރިވެންޝަން، އަދި ސްޓޭޓް ކެއަރގެ ޚިދުމަތްތައް ހިމެނެއެވެ.

ދިވެހިރާއްޖޭގެ ޤާނޫނުގެ ދަށުން އުފައްދާފައިވާ ދެ ކައުންސިލް މިނިސްޓްރީގައި ހިމެނެއެވެ:

• ނުކުޅެދުންތެރިކަން ހުންނަ މީހުންގެ ކައުންސިލް - ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ޤާނޫނު (ޤާނޫނު ނަންބަރު 2010/08) ގައި ބަޔާންކޮށްފައިވާ މަސްއޫލިއްޔަތުތައް އަދާކުރުން
• ކުޑަކުދިންގެ ޙައްޤުތަކާބެހޭ ކައުންސިލް - ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު (ޤާނޫނު ނަންބަރު 19/2019) އާއި އެ ޤާނޫނުގެ ދަށުން ހަދާފައިވާ ގަވާއިދުގައި ބަޔާންކޮށްފައިވާ މަސްއޫލިއްޔަތުތައް އަދާކުރުން

މި ކައުންސިލްތަކަކީ ކުޑަކުދިންނާއި ނުކުޅެދުންތެރިކަން ހުންނަ މީހުންގެ ޙައްޤުތައް ބެލެހެއްޓުމަށް މިނިސްޓްރީގެ އޮނިގަނޑުގެ ތެރޭގައި މިނިވަންކަމާއެކު މަސައްކަތްކުރާ ކައުންސިލްތަކެކެވެ.